Авылда яшәүче хатын төлке тешләгәч үк табибка бармаган һәм үлгән

Волгоград өлкәсендә төлке тешләгән хатын үлгән. Бу турыда «Вести» каналы хәбәр итте.

Михайловка авылында яшәүче 44 яшьлек хатынны төлке тешли. Аннары ноябрьдә анда котыру чире булуы ачыклана. Бу – быел котыру авыруыннан үлемнең беренче очрагы.

Табиблар сүзләренчә, әлеге хатын төлке тешләгәннән соң ашыгыч профилактик ярдәм сорап мөрәҗәгать итмәгән.

Бу турыда «РИА Новости»га төбәкнең сәламәтлек саклау комитетында сөйләгәннәр.

«Мөрәҗәгать иткәндә, гидрофобия симптоматикасы була, табиблар ярдәм итүгә карамастан, ул вафат булды», – дигәннәр ведомствода.

Быел ел башыннан хайваннар тешләп мөрәҗәгать итүчеләр саны 10,5 мең кеше булган. Бу – күп еллар буена уртача күрсәткечтән 28 процентка артык, диелә хәбәрдә.