Авыл блогеры Равил Закиров Чирмешән районы Яңа Кади авылына шәһәр кызлары өчен турлар оештырып танылды. Ул аларның үзләренә акча түләттереп абзарда эшләтте.
Хәзер блогер акрынлап Казанга күченергә җыена. Фатир алды, ремонт ясады, кәләшле булды, җәй никах үткәрергә җыена, акча җыелган очракта туй да үткәрү турында уйлана.
Ул социаль челтрәдәге сәхифәсендә кәләше белән фатирында бергә яши башлаулары белән дә бүлешә. «Бер тапкыр югалта яздым инде, хәзер иң яхшысы – янымда булуы. Мин күбесенчә авылда, ул шәһәрдә фатирымда яши», – дип, бергәләп иртәнге аш ашауларын күрсәтә блогер.
Равилнең дин юлында булуына ишарә ясап: «Бездә никахка кадәр бергә яшәргә ярамый, сездә ничек?» - дигән сорау да юллаганнар.
«Әйе, бергә яшибез. Шул ук вакытта без хисләребезне контрольдә тотабыз, без якынлык кылмыйбыз. Гомер буе көткәнне – берничә ай гына түзә алам инде. Әйе, дин буенча бергә яшәү дә гөнаһ. Бу гөнаһым өчен үзем җавап бирәчәкмен. Мин кайчандыр югалткан кешемне кабат җибәрергә теләмәдем. Янәшәмдә булсын», – дип җавап язган блогер.
Свежие комментарии