Гөлдания Хәйруллина ирен искә ала: «Бүген сиңа 65 яшь тулыр иде»

Татарстанның танылган җырчысы Гөлдания Хәйруллина социаль челтәрдәге сәхифәсендә тормыш иптәше баянчы Рөстәм Хәйруллинны искә ала.

«Бүген композитор, баянчы, тормыш иптәшем Рөстәм Хәйруллинның туган көне. Исән булса, 65 яшь тулган булыр иде. Аның иң беренче минем өчен иҗат иткән һәм мине халыкка таныткан җыры – «Бәллүр чишмә».

«Җиләкле җәй» дигән җыры – чын мәгънәсендә халык җырына әверелде. Бу җырны татар милләте яшәгән җирдә белмәгән кеше юк. «Киңәш», Яшәтәсе иде әниләрне», «Гомер уза», «Табибка» һ.б. җырлары бүген дә җырлана.

Урының оҗмахта булсын!» – дип язган җырчы.

Ул 90нчы еллар башында гастрольләрдә йөргән вакытта төшкән фото белән дә бүлешкән. Хәйруллиннар Нәфисә һәм Ризван Хәкимовлар, Ирек Зарипов белән Башкортстан буйлап гастрольләрдә йөргән.