Тәкермән авылы янында өч баланы бәрдереп үтергән хатын-кызга хөкем карары чыгарылды

Минзәлә янында өч яшүсмерне бәрдереп үтергән хатын-кыз өч ел гомерен колония-посолениедә уздырачак. Аңа карата шундый хөкем карары чыкты.

• Май бәйрәмендә – матәм: Минзәләнең Түбән Тәкермәнендә машина бәрдергән өч баланы җирлиләр

36 яшьлек хатын-кыз «Тойота Камри» машинасында булган.

Югары Тәкермән һәм Түбән Тәкермән авыллары арасында ул идарәне югалткан һәм юл кырыена чыгып киткән. Шушы урында юл кырыннан биш бала барган. Аларның өчесенең: 9, 10 һәм 13 яшьләрдәгеләренең гомере өзелде. Җинаятьтә гаепләнгән хатын-кыз һәлак булган ике малайның туганнан туган апасы да әле.

• «Ул кыз туганнан туганын бәрдергән – «үзем үлгән булсам» ди икән инде Зилә үзе дә...»

Фаҗига быел 28 апрельдә кичке 8ләр тирәсендә Югары Тәкермән һәм Түбән (Тауасты) Тәкермән авыллары арасында булды. Рәсми исеме Тауасты Тәкермәне булса да, минзәләлеләр телендә ул Түбән Тәкермән. Ике авыл арасы 1 генә километр. Шушында 5 бала – 3 малай һәм 2 кызның Түбән Тәкермәнгә өйләренә кайтып барышы булган. Аларның өчесе һәлакәт урынында ук җан биргән. Ике кызга зыян килмәгән.

• Түбән Тәкермәндә фаҗигадә һәлак Саматның әнисе: «Улымның формасын кочаклыйм да елыйм...»

«Саматымны Аллаһы Тәгалә алды, аңа хәзер анда рәхәт… Ә менә безгә, калганнарга ничек яшәргә... Улыбыз безнең бөтен дөньябызны тутырып торган икән», – дип сөйләгән иде «Интертат»ка 13 яшьлек улын юл фаҗигасендә югалткан Рамилә Шәрәфиева.