Анталья аэропортында Сочидан килгән Sukhoi Superjet 100 самолеты двигателенә ут капкан.
Аэропортның янгын сүндерү хезмәте утны тиз арада сүндергән.
Очыш вакытында пассажирлар гадәти булмаган тавыш ишетә. Бер пассажир сүзләренчә, самолет җиргә төшеп утырыр алдыннан шактый вакыт әйләнеп йөргән, ә утырган вакытта кисәк бәрелгән һәм ягулык аккан.
Икенче бер пассажир җиргә кисәк төшеп утыруга игътибар иткән.
«Безнең бәрелгән аңлашыла иде. Балалар кычкырыша башлады, күпләр күршедәге урындыкларга бәрелде», – дип сөйләгән ул.
Самолет төшеп утырганнан салонга куе төтен тула, паника һәм этеш-төртеш башлана.
89 пассажирны һәм экипажның алты әгъзасын кабартылган траптан эвакуациялиләр. Зыян күрүчеләр һәм һәлак булучылар юк. Янгынны сүндерәләр.
Анталья аэропорты эшен вакытлыча туктатып тора, әмма хәзер рейслар кабул итү яңартылган.
«Азимут» авиакомпаниясендә әйтүләренчә, самолетның болай төшеп утыруы җилнең үзгәрүе аркасында килеп чыккан.
Росавиация, Тикшерү комитеты һәм Транспорт прокуратурасы тикшерү уздыра.
Россиянең Төркиядәге Генераль консуллыгы ярдәм күрсәтергә әзер, тәүлек әйләнәсе экстрен элемтә телефоны эшли.
Россиягә кире рейс белән кире кайтырга тиеш пассажирларны резерв самолеты килгәнче кунакханәгә урнаштырганнар.
Бәхеткә, экипажның һәм аэропорт хезмәтләренең оператив эше аркасында корбаннар булмаган.
Свежие комментарии