Бу көннәрдә блогерлар өчен ябык чара булган иде. Аны «Идел» журналы оештырды. Социаль челтәрләрдә күренгәнчә, чарада, блогерлардан кала, мәртәбәле кунаклар да булган. Блогерларны якынлашып килүче Яңа ел белән котларга ТР Дәүләт Советы Рәисе урынбасары Марат Әхмәтов килгән.
Бүген «Бакчачы Рәмзия» блогын алып баручы Рәмзия Әхмәдуллина социаль челтәрдәге аккаунтларында ачык хат урнаштырган.
Әлеге чарадан фото, видеолар урнаштырганнан соң, блогерга ямьсез, хезмәтен кимсетә торган сүзләр язганнар. Бу хәлләр турында ул язылучыларына сөйләп тә уза.Соңга калып кына булса да, блогерлар өчен оештырылган Яңа елдан кичә әз генә өзекләр куйдым. Мин анда дус блогерлар белән бардым. Аннан бер видео һәм бер фото гына керттем. «ВКонтакте» һәм «Телеграм»да язып тутырганнар. Нишләп кешеләр шундый кара күңелле икән? Хөсетләнеп, көнләшеп, нишләп үзләренә бәхетсезлек өстиләр икән? Кешедән көнләшкәннән, күпсенгәннән сиңа берни дә өстәлми. Нигә аңламыйлар икән?
Нишләп блогерларга бәйрәм үткәрәләр, волонтерларга үткәрсеннәр, блогерлар бәйрәм ясарлык нәрсә эшләгән, нәрсә күрсәтәләр, дип язганнар. Берни дә күрсәтмәсәк, дуслар, Марат Готович котларга килмәс иде. Татар телле блогерлар, телне саклап калуда өмет сездә, дигән фикерен әйтмәс иде. Мин үзем дә татар телен бозмыйча, «паразит сүзләр» кыстырмыйча сөйләргә тырышам. Минем чиста татарча сөйләмне кешеләр тыңласын әле, дим. Бу – кешеләргә файда китерү түгелмени? Файда китерүне ничек була дип уйлыйсыз соң?
Волонтер булып кына файда китереп буламы? Дөрес, волонтерларның хезмәте бәяләнергә тиеш. Волонтер булырга кемгә кем комачау итә? Буш вакыт булганда волонтер бул, син дә кешеләргә ярдәм ит, тик кешеләргә ярдәм итү өчен волонтер булу кирәкми. Синең ярдәмгә мохтаҗ кешеләр тирә-юнеңдә, якын кешеләрең арасында. Минем язылучыларым арасында минем ярдәмем тигән кешеләр күп, Аллаһка шөкер. Мин дә үземне волонтер дип әйтә алам, тик алай итәм, болай итәм дип кычкырып йөрмим. Волонтер булырга безгә беркем дә комачауламый. Ярдәмне волонтер булмыйча да күрсәтергә була.
Блогерларның эше акча эшләүгә, рекламага корылган, дип язганнар, шул сүзләрне язган кешегә 20шәр кеше кушылган, беләсезме. Блогерларның аларга нинди зыяны тигән икән, һәм нишләп алар безне карыйлар? Дуслар, карамагыз, бөтен социаль челтәрләрдән чыгып китегез дә телевизор карап кына яшәгез. Кем куша? Минем тирәдәге блогерлар, без блогер булабыз, дип блогер булган кешеләр түгел. Без акча эшләргә дип килгән кешеләр түгел, бу – үзеннән-үзе килеп чыккан әйбер. Мин блогны 5 ел алып барам. 1-2 ел эчендә максатчан рәвештә акча эшләр өчен блогер булган кешеләр дә бар. Алар беркайда да эшләми, бары тик блогны үстерәләр. Мин аларны гаеп итмим, кем ничек булдыра ала, шулай эшли, яши. Мин үз мисалымда әйтәм, минем блог акча эшләүгә корылмаган, минем акча эшли торган эшем бар, Аллаһка шөкер. Ниндидер реклама куям икән, үземә дә файдалы булганга, сезгә дә күрсәтү өчен куям. Әйе, ниндидер керем бар, тик мин алар өчен үзем дә түлим.
Бу – аклану түгел, мин аңлатам гына. Сез экранның икенче ягында һәм күбәү, һәр кешегә директта бу мәсьәләне аңлатып бетереп булмый, шуңа ачык итеп сөйлим. Дуслар, теләмәгән кешене беркем монда бәйләп тотмый. Хәзер тормыш шуңа корылган. Сез мине карыйсыз, мин башкаларны карыйм. Дөнья үзгәрде, аңа ияреп без дә үзгәрәбез, чөнки бу – тормыш таләбе. Яңалыктан артта калмаска кирәк. Менә шундый хәлләр.
Дуслар, хөсетлек, көнчелек кешегә бәхет китерми, алар – кешенең бәхетен һәм сәламәтлеген ала торган сыйфатлар. Син кемнәндер көнләшкәннән, кемгәдер начар сүз язганнан синең малың да, сәламәтлегең дә артмый, икенче кеше рәнҗегәннән сиңа рәхәт килми. Шуңа күрә, сүзләрне чамалап әйтергә, язарга, баштагы фикерләрне тәртиптә тотарга кирәк. Бәхетсез мин, дип зарланалар, бәхетне беркем дә чемоданга тутырып китереп бирми. Бәхет үз кулыңда. Хөсетле кешегә бәхет килми, акыллы булыйк.
Авыр булганда, өмете сүнгән кешегә бер җылы сүз, елмаю, иңеннән кочаклап алу да җитә. Шуны әйтәсем килгән иде. Үзебезгә үзебез дошман булмыйк, бер-беребезгә игътибарлы булыйк.
Бу хәлләрне аңлатканнан соң, күңелен бушатканнан соң, Рәмзия ханым үзенең аккаунтында ачык хат урнаштырган. «Блогерлар эшсезләр, оятсызлар, ирен кабартып, к*т үстереп көн итәләр..» дип әйтүчеләргә җавап, дип аңларга кирәктер.
«Мин тавыш яратмыйм. Зинһар өчен, бу чатта тавыш чыгармагыз! Сөйләсәң – сүз күп инде ул. Мактаныр өчен дә акыл кирәкми. Яхшылык эшлә дә суга сал, халык белмәсә, балык белер, диләр… Яхшылыкны мактаныр өчен түгел, савап өчен эшлик әле. Блогерлар өчен бәйрәмне шул ук блогерлар ясады. Хөкүмәт түгел! Бөтен һөнәр ияләре дә мактауга лаек: врачлар да, укытучылар да, пешекчеләр дә һәм башкалар да…
Бу хезмәт ияләрен (врачлар, укытучылар) хөкүмәт күрә, мактаулы исемнәр, билгеләр дә бирә, дип беләм. Хөкүмәт исәпкә алмаган, әмма алардан башка тормыш бармаган хезмәт вәкилләре дә бар әле…» – диелә хатта.
Свежие комментарии