<p>Абдуллина Рәйсә Илдар кызы Уфа шәһәрендә туа (Башкортстан), 2016 елда гаиләсе белән Балтачка күчеп киләләр. Декабрьда 18 яшь тулган. Әдәби бәйгеләрдә актив катнаша: «Серле каләм», «Лучший журналист», «Иделем акчарлагы», «Сәләткә нур булган йолдызлар» конкурслары җиңүчесе. Шулай ук XI Халыкара олимпиадада гран-при яулады.
Иҗат җимешләре «Көмеш кыңгырау», «Ялкын», «Шәһри Казан»да басылып килә. Моннан тыш, «Татарстан – территория возможностей», «Большая Перемена», «Волонтеры победы» оешмаларында копирайтер вазыйфасын башкара.</p> <p class="faq-question">Рәйсә, язу теләге кайчан барлыкка килде? Нәрсәләр яздың?</p> <p class="faq-answer">7 яшемнән язам мин... Башта лампа малае турында көлкеле шигырьләр язсам, хәзер илебез, тарихыбыз кызыксындыра. Уендагы – кәгазьдә, диләрме әле... Нәкъ шулай минем. Ә болай, поэзия, проза, публицистика өлкәләрендә язам</p> <p class="faq-question">Бигрәк кызыклы тарихың... Ә ни өчен «Алтын каләм» бәйгесендә катнашырга булдың?</p> <p class="faq-answer">«Алтын каләм» – яңа мөмкинлекләр, тәҗрибә туплау өчен менә дигән чара. Монда «яшелрәк» журналист булып килгәннәр дә тәмам «өлгереп җитә». Беренче чиратта бу – сиңа аңларга булыша: әлеге өлкә синекеме, юкмы. Ә тәҗрибәле кешеләр белән утырып сөйләшү, киңәшләшү генә дә никадәр файдалы!</p> <p class="faq-question">Тормышыңны ни өчен иҗат белән бәйләдең?</p> <p class="faq-answer">Мин – иҗади, хыялый бер кыз. Иҗаттан башка яшәвемне гомумән күзаллый да алмыйм.</p> <p class="faq-question">Син, иҗаттан башка яши алмыйм, дидең, әгәр дә иҗат ягы булмаса, нәрсә белән шөгыльләнер идең? </p> <p class="faq-answer">Әгәр дә иҗат булмасамы... Куркыныч сорау. Мөгаен, үземне укытучылыкка багышлар идем.</p> <p class="faq-question">Син бик күп олимпиадаларда катнашасың һәм уңышларың бар. Сиңа олимпиадаларда катнашырга һәм җиңәргә нәрсә этәргеч, көч бирә?</p> <p class="faq-answer">Иң зур этәргеч – куйган максатыңа ирешүне аңлау. Минем төп тәнкыйтьчем дә, мотиваторым да үзем. Шуңа күрә, үземнән канәгать булу хисе – иң зур этәргеч.</p> <p class="faq-question">Син Халыкара олимпиадага бик күп еллар катнашасың, синең өчен Халыкара олимпиада нәрсә ул?</p> <p class="faq-answer">Үз-үзеңә ышаныч, яңа танышулар, туган телең, милләтең, татар халкың белән чиксез горурлану.</p> <p class="faq-question">Рәйсә, син, бу елны Халыкара олимпиадада гран-при яуладым, дидең, син бу олимпиадага ничек әзерләндең? Үзең генә белгән серләр (лайфхаклар) бармы? Бүлеш әле, зинһар.</p> <p class="faq-answer">Миннән берничә лайфхак:</p> <p>1. Белем башта булырга тиеш. Ягъни бөтен әйбер яттан.</p> <p>2. Инша языгыз. Бу – файдалы тәҗрибә.</p> <p>3. Йокыгыз туйсын!</p> <p class="faq-question">Лайфхакларың бигрәк яхшы, олимпиадаларда катнашкан һәр кешегә ярдәм итәчәк. Син, олимпиадада урын алыр өчен, иң беренче чиратта нәрсә эшләргә һәм нәрсәгә игътибар итәргә тәкъдим итәр идең?</p> <p class="faq-answer">Беренче чиратта сиңа бу ни өчен кирәк икәнен аңларга, аннан соң инде әзерлек программасын төзергә кирәк. Грамматиканы өйрәнгәндә, күнегүләр эшләп, белемегезне ныгытырга тәкъдим итәм.</p> <p class="faq-question">Тормышта нинди девизга таянып яшисең? Ул девиз синең тормышыңда кайдан барлыкка килде?</p> <p class="faq-answer">«Максатка ирешү өчен бер әйбер генә кирәк: аңа таба атларга» – кайчандыр кемдер әйткән әлеге фраза – минем девизым.</p> <p class="faq-question">Девизың бик кызыклы, ә синең нинди максатларың бар, нәрсәләр эшлисең аның өчен?</p> <p class="faq-answer">Минем төп максатым – татар телен булдыра алганча үстерү. Моның өчен тат.лерн проектын оештырдым. Тат.лерн — яшүсмерләргә татар телен өйрәтү буенча проект. Мин әлеге проектның методика бүлеген җитәклим, без укучыларга туган телне өйрәнү өчен курслар әзерлибез. Җитәкчебез — Руслан Зәйнуллин. Без Россиякүләм "ПроеКТОриЯ" бәйгесе җиңүчеләре.</p> <p class="faq-question">Ни өчен журналист һөнәрен сайларга булдың? Бу һөнәр сиңа кайсы ягы белән ошый?</p> <p class="faq-answer">Без – кешеләргә кирәкле мәгълүматны җиткерүчеләр бит! Бу, һичшиксез, бик мөһим.</p> <p class="faq-question">Әйдә әле, үткәннәреңне искә төшерик, Рәйсә, мәктәптә иң истә калган вакыйга?</p> <p class="faq-answer">Укытучы апамның «мин синең психологияңне беләм, син, һичшиксез, киләчәктә зур дәрәҗәгә ирешәсең» дигән сүзләре.</p> <p class="faq-question">Вакытны кире кайтарып булса, нәрсәләрне һәм ниләрне үзгәртер идең?</p> <p class="faq-answer">8нче сыйныфта ук «СОлНЦе»га укырга керер идем. Вакытымны заяга уздырмас идем.</p> <p class="faq-question">Авыр чакта нәрсә ярдәм итә?</p> <p class="faq-answer">«Бу сынау» дип уйлыйм. Кара – ак тормышта чиратлашып килә ул. Иң мөһиме: үзеңә тугры калырга кирәк.</p> <p class="faq-question">Рәйсә, максатым – татар телен булдыра алганча үстерү, дидең, шуның өчен татарлык темасына кагыласым килә, синең өчен нәрсә ул татарлык?</p> <p class="faq-answer">Татарлык – үз милләтеңә булган хөрмәт, татар булуың белән горурлану, татар телен камил белү, аны саклап калу, гореф-гадәтләрен белү һәм аны нәселдән-нәселгә күчерү, йолаларны үтәү, үз нәселеңне белү, үткәннәрне белү, динеңне белү – шуларны үтәгән кеше үз-үзен татар дип саный һәм әйтә ала.</p> <p class="faq-question">Син милли җанлы икәнсең... Син татар телен югалтмас өчен нәрсәләр эшлисең?</p> <p class="faq-answer">Туган телемне камил беләм, ул телдә саф, аһәңле сөйләшәм һәм белемнәремне башлангыч сыйныф укучылары белән бүлешәм. Мин татар телен югалтмыйча, аны үстерү өчен барлык көчемне куям.</p> <p class="faq-question">Ә син үзеңне чын татар дип әйтә аласыңмы һәм ни өчен?</p> <p class="faq-answer">Әйтә алам, мин туган телемне чиксез яратам, аны үстерәм һәм татар булуым белән горурланам. Миндә татарларда булган сыйфатлар бар.</p> <p class="faq-question">Татар телен үстерү өчен яшьләр нәрсәләр эшли алалар?</p> <p class="faq-answer">Яшьләр беренче чиратта туган телен хөрмәт итәргә тиеш. Икенчедән, билгеле, телне камил белергә. Ә өченчедән, төрле татар телендә проектлар ясарга һәм татар телен үстерүгә багышланган чараларда, бәйгеләрдә катнашырга тиешләр.</p> <p class="faq-question">Татар телен үстерү өчен үзең нәрсәләр тәкъдим итә аласың?</p> <p class="faq-answer">Татар телен үстерү өчен төрледән-төрле чаралар, проектлар оештырырга һәм шул проектларга яшьләрне җәлеп итәргә кирәк.</p> <p class="faq-question">Кайсы татар шәхесеннән үрнәк аласың? Ул шәхестә нинди татарларга хас булган сыйфатлар бар?</p> <p class="faq-answer">Миңа үрнәк шәхес – Ркаил Зәйдулла. Ул милли әдәбиятыбызны үстерә һәм татарларга хас булган барлык сыйфатларны җыйган шәхес дисәм дә, ялгышмам.</p>
Свежие комментарии