<p>Татарстан Республикасы Рәисе Рөстәм Миңнеханов татар халык бәйрәме – Сабантуй уздыру уңаеннан мөрәҗәгать итте.</p> <p>«Кадерле дуслар!</p> <p>Сезне чын йөрәктән татар халык бәйрәме – Сабантуй уңаеннан тәбрик итәм.</p> <p>Сабан туен уздыруның күпгасырлык традициясе татар халкының хезмәт сөючәнлеген, киң күңеллелеген, юмартлыгын һәм кунакчыллыгын күрсәтә.
Әлеге бәйрәм – игенчеләребезгә, республикабызны азык-төлек белән тәэмин иткән хөрмәтле авыл хезмәтчәннәренә тирән ихтирам билгесе дә.</p> <p>Сабан туенда иҗади һәм ихлас мохит хакимлек итә. Аның киң мәйданы ел саен яше-карты, олысы-кечесе, төрле милләт һәм дин вәкилләре өчен бергәләп аралашу, бердәмлекне тоеп илһамлану үзәгенә әверелә.</p> <p>Моннан тыш, Сабантуй – якын туганнарның, дус-кардәшләрнең очрашу урыны буларак, җылы һәм күркәм гаилә бәйрәме дә. «Гаилә елы»нда бу аеруча мөһим яңгыраш алып, безнең традицион рухи кыйммәтләребезне ныгытуга ярдәм итәр дип ышанам.</p> <p>Быелгы бәйрәм барлык татарстанлыларның тормышында көтеп алынган матур вакыйгага әйләнер, һәркемгә туган мәдәниятебез, гореф-гадәтләребез һәм йолаларыбыз белән танышу мөмкинлеге, үзара аралашудан туган шатлык хисләре бүләк итәр.</p> <p>Сабан туе онытылмас тәэсирләр калдырсын, хезмәттә һәм иҗатта яңа казанышларга рухландырсын!</p> <p>Ихластан һәммәгезгә дә исәнлек-саулык, бәхет, тынычлык һәм иминлек телим!» – диелә котлауда.</p>
Свежие комментарии