Ире ут төрткән хатын авыр хәлдә, әби һәлак булган

Башкортстанда яшәүче ир-ат хатыны һәм хатынының анасы булган өйгә ут төрткән. Әби һәлак булган, хатын авыр хәлдә. Бу турыда «Башинформ» хәбәр итте.

67 яшьлек ир-атны суд СИЗОга озату карарын чыгарган.

Ачыкланганча, 16 майда бу ир-ат фатирда хатыны өстенә янучан сыеклык сибә һәм ут төртә. Шушы ук фатирда хатынның анасы да була.

Ул үзе йөри алмый, өлкән яшьтә. Ир-ат моны белә. Шулай итеп, әби өйдән чыга алмыйча үлә.

Ир үзе өйдән чыгып китә. 62 яшьлек хатын авыр хәлдә, аны реанимациягә салганнар.

Хатын иренең начар гадәтләрен тәнкыйтьләгән булган. Фаҗига шул талаштан соң килеп чыккан, диелә хәбәрдә.