Үзе белән бергә яшәгән ир-атны кыйнап үтергән Әтнә хатынын хөкем иткәннәр

Әтнә район суды 56 яшьлек ир-атны үтергән 54 яшьлек хатынны 9 елга ирегеннән мәхрүм итте, дип хәбәр итә «Татарстан 24».

Фаҗига 2024 елның апрелендә Түбән Бәрәскә авылында була. Хатын үзе белән яшәгән ир белән эчеп утыра. Шунда алар арасында бәхәс чыга. Хатын ирне кыйный башлый. Ул идәнгә егыла, башын бәрә.

Судта аның кимендә 60 тапкыр итеге белән ирнең башына һәм тәненә типкәне әйтелгән.

Бу хатын инде моңа кадәр дә үзе белән яшәгән ирне кыйнаган өчен җинаять җаваплылыгына тартылган булган.