Татарстанның атказанган мәдәният хәзмәткәре, композитор, популяр җырлар авторы Сәүбән Габдрахман улы Чуганаев вафат дип хәбәр итә Вадим Захаров. Ул композиторның фотосын, «Бер елганың ике ярында» җырын куйган һәм «Җырның авторы Сәүбән Чуганаев вафат» дип язган.
Сәүбән Габдрахман улы Чуганаев 1948 елның 3 гыйнварында Пермь өлкәсе Барда районы Йөкшер авылында туган. Композитор, популяр җырлар авторы, җырчы-башкаручы, Татарстанның атказанган мәдәният хезмәткәре.
Татар википедиясендә хәбәр ителгәнчә, 7 яшендә әтисе, 15 яшендә әнисе үлгән. Акбаш сигезьеллык мәктәбен тәмамлагач, Пермьдә «Торгмаш» заводына слесарь-җыючы өйрәнчеге булып урнаша. Кичке мәктәптә, һөнәри-техник училищеда укый. Тын океан флотында хәрби хезмәттә була. Армиядән соң шул ук заводта эшли, кичләрен ул Свердлов исемендәге мәдәният һәм техника сарае каршындагы татар җыр һәм бию ансамбленә репетициягә йөри. Сәхнәгә башта җырчы, аннан баянчы буларак чыга.Пермьдә башлангыч музыкаль белемсез музыка училищесына кабул ителмәгәч, Уфа сәнгать училищесына укырга керә. 1974 елда Уфада «Балан» җырын яза. Уфада ике ел укыгач, Пермь музыка училищесына (хәзерге Пермь музыка көллияте) укырга күчә һәм «Хор дирижерлыгы» бүлеген тәмамлый. 1976 елдан ― Пермьдә җыр һәм бию ансамбленең сәнгать һәм музыка җитәкчесе.
Фердинанд Сәлахов башкаруында «Ах, җаныем, Бибисара!», Салават Фәтхетдиновның «Яран гөл», Айдар Галимовның «Салкын чишмә», Зөһрә Шәрифуллинаның «Кошлар кайткан чак иде», Зөһрә Сәхәбиеваның «Балан», Зөфәр Билаловның «Үрмә гөл», Азат Тимершәехның «Бер елганың ике ярында», Илназ Баһның «Ай кыска шул, кыска гомерләр», Рәсим Низамовның «Болытлар агар инде» җырлары аеручы популярлык казана. 1993 елда «Яран гөл» җыры ел җыры дип танылган.
Ун елдан артык «Өмет» ветераннар хоры белән эшләгән.
Свежие комментарии