Лениногорск районы Шөгер авылында Вильдановлар бакчасында галәмәт зур биеклектә көнбагыш үскән. Әлеге көнбагыш фотосын Вильдановларның кызы Лилия юри генә социаль челтәргә куйган булган, һәм шуннан әлеге фото иң күп караучыларны җыйган, дип яза «Заман сулышы» сайтында Розалия Мостафина.
Бу көнбагыш Шөгердә яшәүче Асия һәм Рәшит Вильдановлар бакчасында үскән, сүз уңаеннан, әле һаман да үсә.
«Яз аенда без чәчкәләр катнашмасы орлыкларын бакчага чәчкән идек. Шушы орлыклардан мондый биек көнбагыш чыгар дип уйламадык та. Ә ул әнә никадәр биеклектә үскән. Әти үлчәп караган, 4 метрдан артык биеклектә инде. Хәзер әти көнбагышны бәйләп куйды, югыйсә аварга мөмкин. Моның кадәр биеклектә көнбагыш үскәне юк иде. Беренче тапкыр күрүебез», – дип сөйләде Лилия.
Фотода Вильдановларның кияве төшкән. Ул үзе дә озын буйлы ир-ат, көнбагыш янәшәсендә исә ул кечкенә буйлы булып калган.
«Кояшка тартыла торгандыр бу үсемлек», «Мондыйны беренче мәртәбә күрәм», «Орлыгы кайсы фирманыкы», «Декоратив көнбагыш шундый була ул», «Моны рекордлар китабына кертергә» дигән комментарийлар калдырганнар.
Фото: © Лилия Шакирова
Свежие комментарии