Татарстанның Мамадыш районында Кама елгасында 3 балыкчы белән көймә әйләнеп капланган.
«Татар-информ»га Россия Гадәттән тыш хәлләр министрлыгының ТР буенча Баш идарәсендә сөйләүләренчә, 2 балыкчы ярга үзләре чыгуга ирешкән, берсен таба алмаганнар.
16-18 апрельдә коткаручылар эзләү эшләре үткәргән. Нәтиҗәдә ярдан 30 метр ераклыкта Киров өлкәсендә яшәүче 60 яшьлек балыкчының мәете табылган.
Һәлакәтнең сәбәбе – су объектларында куркынычсызлык кагыйдәләрен үтәмәү.
Исегезгә төшерәбез: кече судноларның навигация сезоны 25 апрельдә башлана. Моңа кадәр суга чыгу тыелган, хокук бозган өчен 5 меңнән 10 мең сумга кадәр штраф каралган.
Свежие комментарии