<p>Күптән түгел ТР Хөкүмәте йортында узган киңәшмәдә Авыл хуҗалыгы һәм азык-төлек министры <strong>Марат Җәббаров</strong> хәбәр иткәнчә, елның беренче 3 аенда аграр секторда уртача айлык хезмәт хакы 24 процентка арткан һәм 47 924 сумга җиткән. Уртачадан югарырак хезмәт хакын республиканың 16 районында: Яшел Үзән, Мамадыш, Тукай, Бөгелмә, Минзәлә, Мөслим, Алабуга, Питрәч, Менделеевск, Чистай, Әлмәт, Лаеш, Азнакай, Әлки, Чүпрәле һәм Аксубай районнарында авыл хуҗалыгы предприятиеләре хезмәткәрләре ала.
</p> <p>Яшел Үзән районы берничә ел дәвамында 73 048 сум күрсәткече белән хезмәт хакы рейтингында лидерлык итә.</p> <p>Соңгы елларда 66 773 сум уртача хезмәт хакы белән икенче урында торган Тукай районы бер баскычка түбәнрәк төште. Ул үз урынын Мамадыш районына бирде.</p> <p>Мамадыш районында беренче кварталда уртача хезмәт хакы 28 процентка арткан һәм бүгенге көндә 67 834 сум тәшкил итә. Мондый үсешне Марат Җәббаров «Азык-төлек программасы» АПК эшчәнлеге белән бәйли. Анда хезмәткәрләр уртача 71 мең сум ала.</p> <p>Яшел Үзән районында – «Майский» теплица комбинаты, Тукай районында дуңгызчылык һәм кошчылык комплекслары «локомотив» булып тора. Ә Әлки районында авыл хезмәтчәннәренең хезмәт хакы (бер ярым тапкыр) «Хузангай» хуҗалыгы хисабына арткан. Татарстан Республикасы Авыл хуҗалыгы һәм азык-төлек министрлыгы мәгълүматлары буенча, биредә эшчеләр уртача 60 мең сум ала.</p> <p>«РТ» корреспонденты «министрлык»ның хезмәт хакы турындагы мәгълүматлары эш бирүчеләрнең мәгълүматлары белән туры киләме-юкмы икәнен тикшерде. Мәсәлән, «Rabotat.top» сайтында «Хузангай» җаваплылыгы чикләнгән җәмгыятенең май аенда куелган вакансияләре табылды. Анда сыр ясаучы, слесарь-ремонтчы – 30-35 мең сум, терлекче – 35-40 мең сум, прицеплы «КамАЗ» йөртүчесе – 45-60 мең сум, йөкләү-бушату эшләрендә комплекслы бригада механизаторы – 45 мең сум, сыер савучы – 45-55 мең сум, аш-су остасы –- 40-45 мең сум хезмәт хакы күрсәтелгән.</p> <p>Шул ук «Rabotat.top» сайтында АПК «Азык-төлек программасы» ҖЧҖ вакансияләре куелган. Ветеринария фельдшеры – 55 мең сум, терлекче – 36 мең сум, машина белән саву операторы – 55 мең сум, слесарь-ремонтчы – 55 мең сум, авыл хуҗалыгы җитештерүенең тракторчы-машинисты – 65 мең сум, электр-газ белән эретеп ябыштыручысына 65 мең сум тәкъдим ителгән.</p> <p>Социаль челтәрләрдә узган ел «Майский» Теплица комбинаты куйган белдерү табылды: теплица караучылар, электриклар, операторларга 70 мең сумнан хезмәт хакы тәкъдим ителгән.</p> <p>Авыл хуҗалыгы һәм азык-төлек министрлыгының хезмәт хакы рейтингы буенча уртача хезмәт хакы алучы районнар итеп түбәндәге районнар билгеләнгән: Алексеевск районы – 47 563 сум, Тәтеш районы – 46 252 сум, Түбән Кама районы – 43 416 сум, Чирмешән районы – 41 912 сум, Актаныш районы – 40 805 сум.</p> <p>Аутсайдерлар: Апас районы – 30 034 сум, Әгерҗе районы – 29 557 сум һәм Балык Бистәсе районы – 27 475 сум.</p> <p>Балык Бистәсе районының «Кама-Агро» ҖЧҖ (аның оештыручысы-җирле район Советы депутаты Раил Бариев) мисалында күрсәтелгәндә түбәндәге нәрсә ачыкланды: предприятие хуҗасы хезмәт хакын шулкадәр экономияләмәсә, авыл халкы үз хезмәтләре өчен күбрәк акча ала алыр иде.</p> <p>Узган ел бу предприятие 141,5 млн сумлык продукция саткан. «Кама-Агро»да 41 хезмәткәр эшли, алар аена уртача 21 600 сум ала. Шулай итеп, хезмәт хакы фонды керемгә нибары 7,5 процент тәшкил итә. Ә машина белән саву операторларының хезмәт хакы 20 мең сумга кадәр дә җитми – савучыларга сатылган сөттән кергән акчаның 2,5 проценты гына бирелә.</p> <p>ТР Авыл хуҗалыгы һәм азык-төлек министрлыгы башлыгы мондый комсыз җитәкчеләргә үз аппетитларын эшчеләр файдасына киметергә киңәш итте.</p> <p>– Предприятие керемендә хезмәт хакына ким дигәндә 25-30 процент салынган булырга тиеш. Бу – оптималь. Хезмәт хакын бүлүгә карашны яңадан карап чыгарга киңәш итәм. Югыйсә эшчеләр сездән яхшырак хезмәт хакы түли торган милекчеләргә китәчәк, – дип кисәтте Марат Җәббаров.</p> <p>Министр хезмәт хакы, хезмәт җитештерүчәнлеге һәм җитештерүнең табышлылыгы бер-берсе белән тыгыз бәйләнгән һәм бер-берсенә турыдан-туры тәэсир итә икәнен мондый мисал белән күрсәтте:</p> <p>– Әтнә районының «Уңыш» агрофирмасында узган ел керем 449 млн сум тәшкил итте, ягъни һәр хезмәткәргә 6 млн сумнан артык. Бу – бик югары күрсәткеч. Шул ук районда шул ук күләмдә җирләре булган «Дүсем» хуҗалыгында акчалата керем 2е тапкыр азрак, ә бер хезмәткәрнең җитештерүчәнлеге шул ук игенчелек чыгымнары белән 3 тапкыр түбәнрәк. Беренчесендә 17 проценттан югарырак, ә «Дүсем»нең 1,3 проценты гына, ягъни һәр кертелгән рубльнең табышы 13 тапкырга кимрәк. Нәтиҗәдә, «Уңыш» агрофирмасында хезмәт хакы 48 меңгә якын, ә «Дүсем»дә – 1,5 тапкыр азрак.</p> <p>«Республика Татарстан»нан Фәридә Якушева язмасы тәрҗемә ителде</p>
Свежие комментарии