Җырчы Фирдүс Тямаев усал хатыннарга багышланган шаян җыр яздырган.
«Өр-яңа җыр – «Акырма». Бу җыр иң усал хатыннар турында. Мин сезне просто люблю. Ир-атлар, ниһаять, сезнең өчен җыр чыкты. Тиз арада хатыннарыгызга җибәрегез. Хөрмәтле, хатын-кызлар, яратып кына, яме», – дип яза ул Телеграм-каналында, җырдан бер өзек куеп.
Бу җырга карата төрле реакцияләр булачагын Фирдүс алдан ук чамалагандыр. Постны куеп та өлгермәгән, инде: «Без бит болай гына акырмыйбыз. Димәк, акырырга сәбәп биргәннәр», «Фирдүс үзе турында җыр чыгарган», – дип тәнкыйть итүчеләр табылган. Бер язылучысы исә җырның клибында төшкән кызның авырлы булуына игътибар иткән. «Клиптагы кыз бәби көтә. Сез шул рәвешле хатын-кызларга карата шундый мөгамәләдә булуны пропагандалыйсызмы? Куркыныч түгелме? Ичмасам, бу хатын-кызның образын берәр тискәре хатынга алыштырырга иде», – дип тә язганнар.
Җырны ошатучылар да бар. «Ялгыз торна» нервно курит в сторонке», «Ут җыр булган», «Премьера белән», – дип язалар аңа.
Җырның сүзләрен Гөлчәчәк Садретдинова, көен – Марат Галимов иҗат иткән.
Свежие комментарии