«Үзебезнең гаиләдә булган легенданы, риваятьне сөйләп үтим. Без Тукай өстәлен, сәкесен күреп үстек. Картәтиебез Габдулла Хәсән улы Сәмигуллин Аблайга әдипне «Галия» мәдрәсәсе шәкерте Мөхәммәтзакир Хәмзин алып кайтуын сөйли иде. Шәкерт алдан ук хәбәр җибәргән «бик кадерле кунак белән кайтам, пар ат белән килеп алыгыз» дигән. Хәйрелвара Кәлимуллин шулай итеп алып та кайткан. 1 атна буена Чатрага кымызга йөргәннәр. Бөтен бала-чага аларны «Тукай, Тукай!» дип озатып кала. Минем әти белән әни – дүртенче буын туганнар, элек бездә – төмәннәрдә – дүртенче буын туганга өйләнү рөхсәт ителгән. Алтынбай картәти дә Габдулла картәтинең кардәше булгач, Тукайны күрергә кергән булган. Бусагадан кермичә генә күзәткән. «Чәй эчеп утыра иде. Ябык кына, кара гына кеше...»

https://intertat.tatar/news/tukai-cakmagys-yagynda-kymyzga-iorgan-kyzganyc-tarixi-ostal-belan-sakene-yandyrgannar-5865774