45 яшьлек альпинист Казандагы сәүдә үзәгендә эшләгәндә, 6 метр биеклектән егылып төшкән

45 яшьлек сәнәгать альпинисты «KazanMall» сәүдә-күңел ачу комплексында эшләгән вакытта биеклектән егылып төшкән. Бу хакта «Татар-информ» хәбәр итә.

Агентлык чыганагы мәгълүматлары буенча, ир-ат 6 метр биеклектән егылып төшкән һәм күпсанлы сыну җәрәхәтләре алган. Аны Татарстанның Республика клиник хастаханәсенә китергәннәр.

«Ир-ат авыр хәлдә реанимация бүлегенә китерелгән. Хәзер медиклар зыян күрүчегә операция ясый», – дип сөйлиләр «Татар-информ»га РКБ матбугат хезмәтендә.