Табиблар җитмәү сәбәпле, кешеләрне фельдшерлар һәм шәфкать туташлары дәвалый башлый

Яңалык Россиянең бер төбәгендә көтелә.

2025 елның 1 сентябреннән Ростов өлкәсендә һәм башка төбәкләрдә фельдшерлар һәм акушеркалар, бала табуны һәм дарулар билгеләүне дә кертеп, табиб функцияләрен үти алачак. Бу кадрлар кытлыгы белән бәйле. Сәламәтлек саклау министрлыгының тиешле боерыгы хокукый мәгълүматның рәсми порталында бастырылган.

Бу хакта «Панорама» яза.

Документ нигезендә, хастаханә, поликлиника һәм фельдшер-акушерлык пунктлары җитәкчеләре урта медицина персоналына йөклелек вакытында пациентларны алып баруны, бала табуны кабул итүне, дарулар билгеләүне, шул исәптән наркотик һәм психотроп препаратларны, шулай ук беренчел һәм кичектергесез ярдәм күрсәтүне йөкли алачак.

Яңалык предприятиеләрнең сәламәтлек пунктларында, авыл ФАПларында (фельдшер-акушерлык пунктларында) һәм поликлиникаларда эшләүче фельдшерларга кагыла. Элек мондый вәкаләтләр чикләнгән иде.

Төп сәбәп – табиблар җитмәве. Сәламәтлек саклау министрлыгы мәгълүматлары буенча, Сәламәтлек саклау системасында 23,2 мең табиб һәм 63 мең урта медицина хезмәткәре җитми. Акушерлык-гинекология хезмәтендә 3,6 мең ставка вакантлы, ә бу белгечлек буенча ординатураны тәмамлаган һәр өченче кеше билгеләнү буенча эшләүдән баш тарта.

Боерык 1 сентябрьдә үз көченә керә, әмма аның нәтиҗәләре турындагы бәхәсләр дәвам итә. Бер яктан, бу – ерак районнарда яшәүчеләрне медицина ярдәме белән тәэмин итү мөмкинлеге. Икенче яктан – урта персоналга басымны арттыру куркынычы һәм артык йөкләнеш аркасында потенциаль хаталар.

Медицина учреждениеләре җитәкчеләре, хезмәткәрләр компетенциясен билгеләп, вәкаләтләрне кемгә тапшырырга икәнен үзләре хәл итә. Әмма кадрлар әзерләү һәм хезмәт шартларын яхшырту буенча системалы чаралардан башка табиблар кытлыгы проблемасы хәл ителмичә калачак.

Элегрәк Ростов өлкәсендә медицина персоналы кытлыгы 4 меңгә якын кешегә җитүе турында хәбәр ителгән иде.

Ростов өлкәсе хакимияте даими рәвештә медицина персоналы җитмәү турында хәбәр итә. Кадрлар кытлыгы төрле вакытта 40-50% һәм аннан да югарырак булган. Участок табиблары, кече һәм урта медперсонал, аерым алганда, шәфкать туташлары аеруча кирәкле иде.