«Яратырга вәгъдә иттеләр дә үтерделәр». Нәни кызны үз ата-анасы үтергәнче җәзалаган

<p>Адыгеядә 3 яшьлек кызны үтергәннәр. Аның мәетендә коточкыч яралар була. Ата-анасы үз баласын үтергәнче җәзалаган. Бу турыда «Комсомольская правда» хәбәр итте.</p> <p>Адыгейск шәһәрендә 3 яшьлек кыз опека органнары системасының битарафлыгы һәм ата-анасының вәхшилеге аркасында үлә, диелә хәбәрдә.

</p> <p>«Тикшерү ачыклаганча, 30 майда Адыгейск шәһәрендә яшәүче ир-ат өендә 3 яшьлек кызына тән җәрәхәтләре ясый, бала үлә», – дигәннәр Краснодар крае буенча Тикшерү идарәсендә.</p> <p>Нәни Динә (исеме үзгәртелә) туганнан яратмаучылар арасына эләгә. Әнисенең апатиясе, атасының дорфалыгы һәм хыянәте белән очраша. Кыз күпбалалы гаиләдә туа. Атасының беренче гаиләсендә 3 баласы, анасының 2 баласы бар. Туганнарына кирәксез булган Динәне опека органнары алып китә һәм дәүләт тәрбиясендә калдыра. Шунда ул 3 яшькә кадәр яши.</p> <p>Аннары ата белән ана кисәк кенә баланы гаиләгә алырга була. Нәни кызны яратырга, аның турында кайгыртырга вәгъдәләр биреп, 2024 елның мартында Динәне өйгә алып кайталар. 2 айда баланы вәхшиләрчә үтерәләр.</p> <p>«Баланың тәнендә тере урын булмый. Аңа тәмәке төпчекләре тидергәннәр, тән тиресе кисәкләп ерткаланган, иске җөйләре һәм гематомалары күп», – дигән биредә яшәүче Фатыйма исемле хатын.</p> <p>Аның сүзләренчә, баланы үтерер алдыннан көчләгән булулары ихтимал. Хәзер моны тикшерәләр. Экспертизалар билгеләнгән. Атасына гаепләү белдерелгән. Баланы атасы анасы күз алдында җәзалаган. Танышлар сүзләренчә, әнисе дә балага кул күтәргән. </p> <p>Прокуратура да тикшерү башлаган.</p> <p>Баланың хастаханәдә үлүе билгеле. Ата-анасы табибларга «бала баскычтан егылып төште» дигән. Шуңа күрә ул башыннан аягына кадәр кара янган, имеш. Табиблар баланы коткарырга тырыша, тик сабый үлә.</p>