<p>Россия туроператорлары ассоциациясендә хәбәр итүләренчә, май ахырына ил буенча турларның 60 проценты сатылып беткән. Иң күп турлар июнь аена сатылган. Бу хакта «Российская газета» яза.</p> <p>Россия халкы сайлаган юнәлешләр арасында иң популярлары – Кырым һәм Краснодар крае, «Кавминводы» курорты, Мәскәү, Санкт-Петербург.
Шулай ук Россия буенча елга круизлары, Дагыстан, Калининград өлкәсе, Казан һәм Алтай да унлыкка кергән.</p> <p>Соңгы мәгълүматлар буенча, «Кавминводы» курортларына турлар сату 7 процентка арткан. Бу ихтыяҗ белән түгел, ә базарның сыйдырышлылыгы белән аңлатыла – Кисловодскида, Пятигорскида, Ессентукида барлык санаторийлар да сатылып беткән диярлек. Хәзер туроператорлар бернәрсә дә тәкъдим итә алмый. Россия халкында үзебезнең илдә ял итүгә ихтыяҗы гаять зур, ә кунакханә һәм санаторийлар җитми.</p> <p>Пляж туризмы 75 процентны тәшкил итә. Әмма бу турлар да «кесәгә суга» торган. Бәяләр 15-20 процентка (Кырымга нибары 5 процентка) арткан.</p> <p>Бару-кайту бәясен санамыйча, Сочига 9 төнгә барып кайту 75-105 меңгә чыга. Анапада 9 көн ял итү 73-116 мең, Геленджикта 69-109 мең, ә Кырымда 10-11 төн 77-89 мең, Кисловодскида – 85-107 мең, Санкт-Петербургта – 33-35 мең, Мәскәүдә – 20-22 мең, Мәскәү өлкәсендә 90-97 мең сум була.</p> <p>Шуңа өстәп, кунакханәлә бәяләренә караганда, авиабилетларга бәяләр тизрәк арта: август аенда 1 кешегә Мәскәү – Сочи – Мәскәү маршруты 30 меңнән кыйммәтрәк булачак.</p> <p>«Хәзер Сочига барып кайту кечерәк кенә туй уздыру бәясе белән бер», – дип сөйләгән Россия туроператорлары ассоциациясе президенты Сергей Ромашкин. </p>
Свежие комментарии