Ростов өлкәсендә үтерү оештырырга теләгән 67 яшьлек ир-атны хөкем итәчәкләр. Пенсионер күп еллар фермерлык белән шөгыльләнгән. Әмма соңгы вакытта аның бизнес буенча партнеры белән җитди каршылыклары барлыкка килгән. Үзара килешә алмагач, пенсионер кардиналь чараларга карар кылган, дип яза Комсомольская правда.
Фермер үзенең дустына криминаль тәкъдим белән килә, партнерын юк итәргә теләвен әйтә. Ул аның өй адресын да, көндәлек маршрутларын да, көндәлек эшләрен дә белә. Очрашу азагында, эш бирүче дустына «мәсьәләне хәл итү өчен» 2,5 млн сум бирә.
Акча алгач, арадашчы эшне башкаручыны эзли башлый. Тиздән акча өчен кеше үтерергә риза булган кандидат та табыла, ул исә үзенә булышчы дус та таба. План бик гади була: корбанга кырда кешесез урында очрашу билгеләргә.
Һәм менә билгеләнгән көнне коммерсант очрашуга килә. Ул үзен эшлекле әңгәмәгә чакырдылар дип уйлый.
Заказны үтәргә тиешле кешеләр корбан белән тормыш турында сөйләшә башлый. Әңгәмә озаграк барган саен, аларның аны үтерү теләге кими бара. Нәтиҗәдә, «киллерлар» кире уйлыйлар һәм китеп баралар. Ә тиздән барысын да тикшерүчеләр белеп ала.
Ростов өлкәсе буенча Тикшерү комитеты матбугат хезмәтендә хәбәр итүләренчә, алга таба үлем инсценировкаланган, үтерергә тиешле кешеләр заказ бирүчегә «заказ үтәлде» дип ялган дәлилләр тапшырганнар. Нәтиҗәдә, фермер-пенсионерга «Үтерүгә әзерлекне оештыру» маддәсе буенча җинаять эше кузгатканнар.
Свежие комментарии