Чаллы табибы Казаннан Төркиягә оча торган самолет бортында ир-атны коткарган

Чаллының 2нче номерлы хастаханәсендә эшләүче реаниматолог Марат Альмакаев төнлә Казаннан Анталиягә оча торган самолетта хәле начарланган пассажирга медицина ярдәме күрсәткән. Бу турыда «Горздрав Челны» телеграм-каналы хәбәр итә.

Самолет күтәрелгәннән соң, бер сәгать үткәч пассажирның хәле киткән. Очкыч капитаны тавыш көчәйткеч аша табиб ярдәме кирәклеген белдерә.

Марат Альмакаев йоклаган булган.

«Мин хатын-кыз тавышы ишеттем. Иренә ярдәм кирәк, дип кычкырды. Стюардессалар җыелган урынга килдем. Урта яшьтәге ир-атны күрдем, ул агарганган, тирә-юньдәгеләргә җавап бирми иде. Кан басымы төшкән, брадикардия башлаган. Ир-ат аңын югалта башлады», — дип сөйләгән табиб.

Реаниматолог сәбәбен аңлаган һәм бу кешегә ярдәм күрсәтә башлаган. 10 минуттан соң пассажир аңына килгән, кан басымы нормальләшкән, йөзе алсуланган, сөйләшә башлаган.

Соңрак билгеле булганча, ир-атның йөрәге хәлсез, чөнки 2017 елда ул миокард инфаркты кичергән. Табиб стюардессалардан пассажирга каты баллы чәй китерүне сораган.