Чүти авылында махсус хәрби операциядә һәлак булган Альфред Козлов белән хушлашканнар

Кайбыч районы Чүти авылы халкы махсус хәрби операция зонасында батырларча һәлак булган Альфред Козловны соңгы юлга озатты.

Мәрхүмнең йорты янында үткән хушлашу мәрасимен Апас һәм Кайбыч районнарының хәрби комиссары Наил Җантимеров алып барды. Батыр белән хушлашырга район башлыгы урынбасары Рәмис Хәялиев, Чүти авыл җирлеге хезмәткәрләре, әфганчылар, авылдашлары, тирә-күрше авылларда яшәүчеләр килгән.

Рәмис Хәялиев, җирлек секретаре Гөлнур Әхмәтшина, Гөлгенә Аймәтова Альфредны бары уңай яктан телгә алдылар, туганнарының, гаиләсенең авыр кайгысын уртаклаштылар, дип яза «Кайбыч таңнары» басмасы.

Альфред Хәлил улы Козлов Чүти зиратында җирләнгән.

Туганнары, якыннарының авыр кайгысын уртаклашабыз!