Фидан Гафаровның улы Азамат кайгылы көнне дә спектакльдә уйнаган: «Әти дә шулай итәр иде»

Башкортстанның һәм Татарстанның халык артисты Фидан Гафаровның арабыздан китүе билгеле булды. Авыр югалтуына карамастан аның улы, Башкортстанның халык артисты Азамат Гафаровка әтисе үлгән кайгылы көнне дә тамашачы алдында чыгыш ясарга туры килгән. М.Гафури исемендәге Башкорт дәүләт академия драма театры Сибай шәһәрендә гастрольләрдә.

Азамат Гафаров «Җырланмаган җырым син» спектаклендә Хәсән ролен уйнаган һәм Сибай тамашачысына спектакльнең әтисе истәлегенә куелуын хәбәр иткән.

«Әтием дә «спектакльдә уйныйбыз» дип әйтер иде. Без дә уйнарга булдык. Коллегаларым, зур рәхмәт сезгә. Әтием истәлегенә, хөрмәтенә, сезнең өчен спектакль уйнарга булдык. Ул да шулай эшләр иде. Чөнки сәнгатькә бик тугры кеше иде ул. Рәхмәт сезгә», – дигән Азамат Гафаров.

Видеоны безгә артистның сәхнәдәшләре юллады.

Азамат Гафаровның тирән кайгысын уртаклашабыз.