<p>Җырчы Ришат Фазлыйәхмәтов соңгы арада социаль челтәрләрдә сирәк күренә. Ул да, аның тормыш иптәше Эльмира – Тәтишка да югалды. «Интертат» бу парның аккаунтларыннан бер-берсенең фотоларын бетереп атулары хакында язган иде. Ришат Фазлыйәхмәтовта да, Эльмираның сәхифәсендә дә парлап төшкән фотосурәтләре күренми.
Эльмирада хәтта никах фотолары да бетерелгән.</p> <ul> <li>Ришат Фазлыйәхмәтов кабат Тәтишка белән түгел... Бу юлы бар да чынга охшап тора</li> </ul> <p>«Интертат» хәбәрчесе, шалтыратып, Ришатның хәлләрен белешергә булды. Ләкин җырчы бу темага сөйләшмәү яклы.</p> <p class="faq-question">Ришат югалып тордыгыз соңгы арада, сирәк күренәсез. Хәлләрегез ничек?</p> <p class="faq-answer">Күренәм бит, сторислар куям. Артыгы кирәкми, азрак сагынсын халык.</p> <p class="faq-question">Быел кайсы район Сабантуйларында җырлыйсыз?</p> <p class="faq-answer">Әйе, Сабантуйлар, чаралар планлаштырган. Тиздән менә федераль Сабантуйга, Йошкар-Олага китәм. Калган Сабантуйлар буенча мәгълүматны әйтмим әле берсенә дә. Татарстан районнарында да, төбәкләрдә дә, күп җирләрдә булам быел, Аллаһ теләсә.</p> <p class="faq-question">Тәтишка кайда? Бергә төшкән фотоларыгыз да юкка чыкты. Барысы да әйбәтме сезнең?</p> <p class="faq-answer">Куймыйм фотолар, алайса, күз тидерәләр. Бик күрсәтәсем килми.</p> <p class="faq-question">Эльмира да куймый бит. Сезне яңадан аерылышканнар, дип тә сөйлиләр.</p> <p class="faq-answer">Сөйләсеннәр. Мин бернәрсә әйтмим бу турыда, сөйләшәсем килми. Гаилә темасын язарга кирәкми, бу халыкка кызык түгел.</p> <p class="faq-question">Теге вакытта зурлап сөйләгән идегез бит?</p> <p class="faq-answer">Әнә шул вакытта чыгардык та, мине нык кына сүктеләр. Шуннан бирле гаилә темасына сөйлисем килми. Нәрсәгә чыгарганмын дип үкендем.</p> <p class="faq-question">Негатив күп булдымы?</p> <p class="faq-answer">Негатив та килде, рейтингка да тәэсир итте.</p> <p class="faq-question">Андый хәлләр, кайберәүләрнең рейтингын, киресенчә, күтәреп җибәрә.</p> <p class="faq-answer">Җибәрсен. Гаиләдә булган гаиләдә калырга тиеш. Гаилә ул аерым фронт, эстрада – башка фронт. Кеше аерылганмы, кушылганмы, нәрсәгә кирәк соң ул халыкка? Миңа килешми андый әйберләр. Күбрәк иҗат турында сөйләргә кирәк.</p> <p class="faq-question">Әйдәгез, иҗат турында сөйләгез әле.</p> <p class="faq-answer">Чаралар, Сабантуйлар инде алда. Яңа җырлар күп җибәрәләр, җырлар сайлыйм. Аранжировкалар эшләтеп, аларны халыкка чыгарырга иде. Әлегә шундыйрак ниятләр.</p> <p class="faq-question">Күбрәк кайсы авторлар белән эшлисез?</p> <p class="faq-answer">Күбрәк Фирзәр абый Мортазин белән эшлим, ул җырларыма көйләр яза. Шигырь авторлары күп, аерып кына әйтеп бетереп булмый. Киләсе сезонда халыкка ишеттерербез яңа җырларны..</p> <p class="faq-question">Яңа администратор да алгансыз икән. Ул Эльмира урынында эшлиме?</p> <p class="faq-answer">Администраторыбыз юк иде безнең. Төгәлрәге, бар иде, ләкин читтән генә эшләде, минем белән йөрмәде. Администратор Эльмира урынында түгел, Эльмира ул – продюсер. Яңа администраторны март аенда алдык. Руслан исемле егет, минем уң кулым, төп ярдәмчем.</p> <p class="faq-question">Ниләр белән шөгыльләнәсез соңгы вакытта?</p> <p>Авылда. Нигезне карыйбыз, печәннәр чабабыз, бакча эше. Авылда үзегез беләсез инде.</p> <p class="faq-question">Гел авылда булгач, тавык-чебеш тотмыйсызмы?</p> <p class="faq-answer">Юк инде, кем карый аны. Мин кешегә тавык алып бирәм дә шуның йомыркасын гына ашыйм. Бартер шартларында яшим (<em>көлә</em>). Әнинең сеңлесе – апалар авылда яши бит, йомырка алардан килә, Аллаһка шөкер.</p> <p class="faq-question">Рәхмәт, яхшы яллар, Ришат.</p> <p> </p>
Свежие комментарии