Чүпрәле районының Кече Чынлы авылында быел 7 июньдә Сабантуй көтелә. Алар быел хатын-кыз көрәше оештыра. Бу хакта «Родной край» басмасы хәбәр итә.
Көрәш батыры булган хатын-кызга – 100 000 сум, катнашкан һәр ханымга – 10 000 сум билгеләнгән. Бу хакта «Цильна» җәмгыяте җитәкчесе Барис Гафуров хәбәр иткән.
Бу хәбәргә бәйле рәвештә, татар чатларында кызыклы аудио-язма да таралды.
«Егетләр, кемнәрнең хатыннары бар, Чынлыга көрәшкә алып килегез. 100 мең куйганнар беренче урынга! Алып килегез хатыннарыгызны, 1 сәгать эчендә 100 мең эшләп алырга», – дип сөйлиләр ул язмада.
Кунакларны онытылмаслык тамаша да көтә: бәйрәмгә татар эстрадасының танылган җырчысы Ильсия Бәдретдинова да чакырылган. Халык өчен дәртле биюләр, моңлы җырлар, кызыклы милли уеннар әзерләнә, диелә хәбәрдә.
Сабантуй 10:00 сәгатьтә башлана.
Свежие комментарии