Гүзәл Идрисова-Бах тормыш иптәше Илназ Бахны кайсы сыйфатлары өчен хөрмәт итә, ярата? 3 малай әнисе булуы җиңелме? Җырчы бу хакта «Туган тел» телеканалындагы «Сер итеп» тапшыруында бәйнә-бәйнә сөйләгән.
Гүзәл сүзләренчә, ире Илназ аны юмор хисле булуы белән үзенә караткан.
«Ул бит шундый шаян, сүз артыннан кесәгә керми.
Юмарт. Мин саран ир-атларны, гомумән, яратмыйм.Мәсәлән, әле өйләнешкән генә вакытта мин ул кадәр әрсез түгел идем. Телефоннан шалтыратып, Илназ белән «кайсы әйберне алыйм икән» дип киңәшәм. Ватсап аша фотосын җибәреп: «Кайсы күбрәк ошый сиңа?» – дип сорыйм. «Икесе дә ошый икән, икесен дә ал», – ди.
Мәһәргә бүләк сайлаганда да «иң матурын, иң зәвыклысын ал» дип калды. Алтын беләзек белән алтын муенса карадым. «Ой, миңа монысы да килешә, монысы да килешә, кайсын алыйм икән?» – дим. Икесен дә алырга кушты», – дип сөйли Гүзәл.
Әңгәмә барышында җырчы тормыш иптәше турында бөтен серләрне дә ачты. Илназ Бах кунаклар чакырырга да, кунакка йөрергә дә ярата икән.
«Илназ ул – кеше-бәйрәм. Аңа өйдә утырырга гына булмасын. Тик кунак чакырабыз икән, без эшләрне бүлешәбез. Элек бит ир-ат хатын-кызга салына иде. Хәзер без бергә кабул итәбез, бергә әзерлибез һәм бергә җыештырабыз.
14 ел эчендә күп нәрсәгә өйрәнәсең, бер-береңә яраклашасың да инде. Аннан эшне «хатын-кызныкы», «ир-атныкы» дип бүлешергә кирәкми, бу – минем фикер, малайларны да шулай тәрбиялим. Ир-ат әзергә-бәзер булып, «хәзер хатын кайтыр да носкиемны юар» дип утырырга тиеш түгел. Хатын-кыз, бәлки, хастаханәгә кереп ятар, ул чакта нәрсә, ачтан үләрләрме? Шуңа күрә пешерергә дә өйрәнәләр, киемнәрен дә чиста кияләр, өйне дә пөхтә тоталар. «3 бала анасы – спецназ» диләр бит, менә минем турыдагы сүз ул.
Балаларга карата усал була да, кирәк чакта йомшак итеп сыйпый да беләбез. Олы малай баянда уйный бит. Аңа берәр матур сүз әйтеп җибәрсәң, чәчәк ата инде», – дип сөйли Гүзәл Идрисова-Бах.
Свежие комментарии